Pas ngjarjes që tronditi qytetin e Shkodrës të dielën, ku burrë e grua u gjetën të vrarë me armë zjarri në mjetin e tyre, policia ka nisur kontrollet blic, ku vetëm në një lokal bastesh u arrestuan tre persona me armë zjarri.

Operacioni i Policisë dhe FNSH së Shkodrës arrestoi në një lokal në Vaun e Dejës Enduel Bajraktari, 29 vjeç, Mirjan Ndoj, 27 vjeç, dhe Marisjen Gjoka, 20 vjeç, banues në Vau i Dejës.

“Arrestimi i tyre u bë pasi gjatë kontrollit të ushtruar në ambientet e sallës së lojërave lloto, në qytet Vau i Dejës, u gjetën dhe u sekuestruan në cilësinë e provës materiale një armë zjarri automatik model 56 dhe dy pistoleta tip TT. Gjithashtu gjatë kontrollit të ushtruar në banesën e shtetasit Enduel Bajraktari u gjet dhe u sekuestrua 500 gram lëndë e narkotike Cannabis Sativa”,thuhet në njoftimin e policisë.

Por teksa policia e Shkodrës bën të ditur se ata dyshohen se janë autorë për disa vepra të tjera penale, por pa saktësuar konkretisht për çfarë bëhet fjalë, teksa gjithë policia e Shkodrës është ngritur në këmbë për zbardhjen e ngjarjes së rëndë.

Për momentin tre të rinjtë akuzohen për “Prodhimi dhe shitja e narkotikëve” e “Mbajtja pa leje dhe prodhimi i armëve, armëve shpërthyese dhe i municionit”./tch