Trajneri i njohur kosovar, Qëndrim Kida i është rikthyer zejës së trajnerit, teksa do të udhëheqë klubin e promovuar sivjet në elitë, Prishtinën e Re.

Kështu ka bërë të ditur klubi kryeqytetas duke thënë se me të do të shkojnë drejt stabilitetit.

“KF Prishtina e Re njofton opinionin publik, tifozët dhe komunitetin futbollistik se nga sot, Qendrim Kida emërohet Kryetrajner i ekipit të parë. Ky vendim vjen si pjesë e strategjisë sonë të re për konsolidimin e ekipit, rritjen e stabilitetit dhe riformësimin e mentalitetit fitues brenda skuadrës. Klubi beson fuqimisht se me emërimin e Qendrim Kida si Kryetrajner, fillojmë një faqe të re të rëndësishme drejt stabilizimit dhe progresit. Jemi të bindur se me punë, disiplinë dhe bashkëpunim, ekipi do të rikthehet atje ku e meriton. Klubi i uron trajnerit Kida mirë se ardhje dhe shumë suksese në detyrën e re”, shkruan Prishtina e Re në “Facebook”.

Momentalisht, Prishtina e Re është e fundit në renditjen tabelare të Superligës së Kosovës, me vetëm nëntë pikë të grumbulluara nga 14 ndeshje.