Vushtrria dhe Flamurtari i kanë ndarë pikët në javën e nëntë në Superligën e Kosovës, pasi ndeshja përfundoi 2-2.

Të parët ishin vushtrriasit që kaluan në epërsi me golin e shënuar nga Ismet Lushakut në minutën e 30-të, e që pjesa e parë përfundoi me këtë gol.

45 minutëshi i dytë ishte edhe më i zjarrtë, pasi në të u shënuan tre gola të tjerë dhe që në fund doli të mos ketë fitues.

Vendasit arritën që ta dyfishonin epërsinë me golin e shënuar nga Matheus në minutën e 61-të, por më pas Flamurtari u vendos më shumë në fazën ofanzive.

Fillimisht rezultatin për mysafirët e ngushtoi Egzon Krasniqi (68’), e që më pas lojtarët morën zemër dhe shënuan edhe të dytin.

Golin e dytë për Flamurtarin e realizo Torvioll Stullqaku në minutën e 80-të, duke bërë që të dy skuadrat të merrnin nga një pikë.

Pas javës së nëntë, Flamurtari gjendet në pozitën e dhjetë me tetë pikë, të ndjekur nga Vushtrria me një pozitë më poshtë me gjashtë.