Trajneri i Empolit, Roberto D’Aversa ka folur për të ardhmen e mbrojtësit shqiptar, Ardian Ismajli, i cili po lidhet me një transferim të madh gjatë afatit kalimtar të janarit.

Në fund të ndeshjes ku Empoli barazoi 1-1 ndaj Udineses , trajneri i skuadrës toskane Roberto D’Aversa analizoi ndeshjen dhe u ndal në veçanti një lojtar që po tregon gjëra të mëdha që nga fillimi i kampionatit.

Bëhet fjalë për mbrojtësin shqiptar, Ardian Ismajli, i cili ka qenë njëri nga mbrojtësit më të mirë në Serie A këtë sezon.

Pas paraqitjeve të mira dhe pas dëmtimit të Gleison Bremerit te Juventusi, Ismajli ka përfunduar në fokusin e klubit bardhezi, me drejtorin teknik Cristiano Giuntoli i cili e ka përfshirë në objektivat e tyre dimërore.

Fjalët e trajnerit të Empolit të lëshuara në konferencën për shtyp konfirmojnë interesimin e klubeve të mëdha italiane dhe largimin e mundshëm të qendërmbrojtësit prishtinas në afatin e janarit.

“Ne flasim shumë pak për Ismajlin, vazhdojmë ta bëjmë këtë sepse mund të ketë rrezik që të mos e kemi atë në janar”, ka thënë D’Aversa pas ndeshjes.

Përveç Juventusit, interesim për qendërmbrojtësin nga Kosova ka shprehur edhe lideri aktual i Serie A, Napoli. /Telegrafi/