Llapi ka arritur të mposhtë Lirinë në Prizren dhe është ngritur në vendin e dytë.

Pas ndeshjes trajneri i Llapit Tahir Batatina, e ka cilësuar si stërvitje ndeshjen ndaj Lirisë, shkruan Arbresh.info.

“Sot kemi bërë stërvitje. Këta djem po ma shijojnë futbollin evropian, po ma shijojnë lojën të cilën e kam kërkuar. Djemtë janë më meritorët për këto rezultat”, ka thënë Tahir Batatina.

Tutje ai ka shtuar se skuadra e tij ka krijuar një mentalitet fituesi.

“Si skuadër kemi krijuar mentalitet fituesi. Skema e lojës tonë asnjëherë nuk është e njëjtë. Po bëhet një rotacion të cilën po e mbaj për vete dhe nuk po e zbuloj këtu. Është sistem bashkëkohor”, shtoi Batatina.

Ai nuk kurseu as lavdatat për lojtarin e tij Muhamet Hyseni të cilin e përgëzoi për golat e shënuar.

“Lirinë e kemi respektuar maksimalisht, por mendoj se duke dhënë maksimumin arritëm me shumë meritë fitore. Kur ke një lojtar si Muhamet Hyseni në skuadër, është lehtë të realizohen golat. E përgëzoj Muhamet Hysenin i cili nga çdo situatë mund të shënoj gol”, potencoi ai.

Për fund ai përgëzoi lojtarët, tifozët kryesinë dhe të gjithë ata që po i qëndrojnë afër Llapit në çdo ndeshje.

“Mund të them që dominuam tërë kohën, skuadra krijoi shumë dhe me meritë fituam lojën. Përgëzoj lojtarët, kryesinë për kushtet dhe tifozët ‘Legjendat’ që i kemi afër në çdo ndeshje”, përfundoi Tahir Batatina.

Llapi pas kësaj fitore është ngritur në vendin e dytë me 34 pikë./Arbresh.info/