Trajneri i Kombëtares së Shqipërisë, Silvinjo ka thënë se Shqipëria është gati për të bërë një ndeshje të mirë kundër Moldavisë dhe për të marrë maksimumin.

Shqipëria pas humbjes në ndeshjen e parë nga Polonia, rikthehet në Tiranë për ta zhvilluar ndeshjen e dytë në kuadër të fushatës së kualifikimeve për Euro 2024.

I shoqëruar nga futbollisti Elseid Hysaj, trajneri brazilain ka folur para ndeshjes.

“Duhet të theksojmë se kemi para shtatë finale. Nesër do të luajmë finale e parë, atë ndaj Moldavisë që është ndeshje shumë e rëndësishme për ne. Unë jam i bindur se ekipi ynë do të bëjë një lojë shumë të mirë dhe do të luajë fort ndaj një ekip si Moldavia, që deri më tani ka dy barazime. Jam i bindur që kemi një grup të mirë, që do të luajë me zemër dhe do të japë shpirtin në fushën e lojës. Shqipëria është gati për të bërë një ndeshje të mirë dhe për të marrë maksimumin nga kjo sfidë”, ka thënë Silvinjo. “Objektivi ynë është kualifikimi për në finalet e kampionatit evropian”.