Shqipëria e ka nisur në formë të keqe rrugëtimin e tyre drejtë kualifikimit të mundshëm në Kampionatin Evropian 2020.

Kombëtarja shqiptare është mposhtur me rezultat 0 me 2 mbrëmjen e sotme (e premte) në stadiumin “Loro Boriçi” në Shkodër nga Turqia, shkruan portali arbresh.info.

Sulmuesi Burak Yilmaz realizoi golin e avantazhit për mysafirët në minutën e 21′, ndërsa golin tjetër e realizoi në formë të shkëlqyer mesfushori i AC Milanit gjatë pjesës së dytë.

Me goditjen “raketë”, Hakan Calhanoglu tundi rrjetën e portierit Etrit Berisha gjatë minutës së 55′ të pjesës së dytë për t’i shkaktuar një disfatë mjaftë të rëndë skuadrës nën udhëheqjen e trajnerit Christian Panucci qysh në xhiron e parë të ndeshjeve në kuadër të kualifikimeve.

Trajneri 45-vjeçar bëri ndryshime menjëherë duke inkuadruar në fushë Armando Sadikun dhe Eros Grezdan, por dyshja nuk arritën të ndikojnë në rezultat ndonëse rastet nuk munguan.

Andorra është rivali i ardhshëm i Shqipërisë në kuadër të kualifikimeve dhe ndeshja luhet të hënën, ndërsa Turqia do të përballet me Maldovën në fillim të javës së tjetër./arbresh.info/