Piloti britanik i Mercedesit, George Russell, ka triumfuar në Çmimin e Madh të Singaporit, të zhvilluar në pistën e famshme Marina Bay, ndërsa McLaren konfirmoi matematikisht mbrojtjen e titullit të konstruktorëve.

Kjo ishte fitorja e pestë në karrierë për Russell dhe e dyta e këtij sezoni, pas triumfit në Kanada. Britaniku e nisi garën nga pozicioni i parë dhe e udhëhoqi nga fillimi deri në fund, duke regjistruar një paraqitje mbresëlënëse dhe pa gabime.

Max Verstappen (Red Bull) përfundoi në vendin e dytë, ndërsa Lando Norris (McLaren) e mbylli garën në pozitën e tretë.

Shoku i tij i skuadrës, Oscar Piastri, përfundoi menjëherë pas tij në vendin e katërt, ndërsa piloti i ri italian i Mercedesit, Kimi Antonelli, zuri vendin e pestë.

Ekipi i Ferrarit u detyrua të kënaqej me vendin e gjashtë dhe të shtatë, ku përfunduan Charles Leclerc dhe Lewis Hamilton.

Në renditjen e përgjithshme të pilotëve, Oscar Piastri vazhdon të kryesojë me 22 pikë epërsi ndaj Norris, ndërsa Verstappen ndodhet në vendin e tretë, 63 pikë prapa.

Falë rezultateve të shkëlqyera të Norris dhe Piastri në Singapor, McLaren siguroi titullin e konstruktorëve, duke lënë pas Mercedesin dhe Ferrarin.

Kampionati botëror i Formula 1 do të vazhdojë më 19 tetor me Çmimin e Madh të Shteteve të Bashkuara, që do të zhvillohet në pistën e Austinit.