Sigal Prishtina ka pësuar humbje pas vazhdimeve në Pallatin e Rinisë nga islandezët e Tindastoll me rezultat final 98-104 në kuadër të ENBL.

Prishtinasit ishin më të mirë gjatë gjithë ndeshjes duke qenë në epërsi pothuajse gjatë gjithë kohës ku epërsinë më të lartë e patën +18.

Islandezët shtrënguan mbrojtjen dhe ishin vazhdimisht në ndjekje të rezultatit ku për herë të parë dolën në epërsi në 2 minutat e fundit të çerekut të katërt.

Rezultati pas 40 minutash ishte 87-87 ku ndeshja shkoi në vazhdime por që prishtinasit humbën 11-17 në vazhdime.

Tek Prishtina, Burns u dallua me 31 pikë, dhe Bailey me 27 pikë e 12 kërcime, kurse tek islandezët shkëlqyen, Basile me 27 pikë dhe Drungilas me 21 sosh.

Prishtina pas shtatë ndeshjesh ka katër fitore e tri humbje, derisa Tindastolli ka pesë fitore e një disfatë./Arbresh.info