Pas javësh tensioni dhe pasigurie, lojtarët e “Los Blancos” janë rreshtuar pas Xabi Alonsos, duke ndërtuar një unitet që për një moment dukej i humbur.

“Më mirë vonë se kurrë”. Edhe dinamika e Real Madridit duket se e gjen kuptimin e saj në këtë shprehje.

Ditët e fundit, atmosfera brenda ekipit ka ndryshuar ndjeshëm. Lojtarët po tregojnë empati, po marrin përgjegjësi dhe po përpiqen të japin maksimumin për të shmangur një skenar që ende mbetet i hapur.

Ndeshja ndaj Alavesit ishte e rëndë në aspektin mendor, pasi çdo paraqitje mund të kishte pasoja vendimtare për të ardhmen e trajnerit. Fitorja nuk ishte vetëm tre pikë, por edhe kohë e fituar.

E ardhmja e Xabi Alonsos mbetet e paqartë, ai mund ta përfundojë sezonin në stolin e Real Madridit, por edhe të largohet në çdo moment. Megjithatë, një gjë është e qartë – ai ka mbështetjen e lojtarëve.

Kjo u reflektua qartë në festimin e golit vendimtar. Vinicius Junior ishte protagonisti i aksionit që mbajti gjallë Real Madridin.

Menjëherë pas kësaj, braziliani vrapoi drejt stolit për të përqafuar Xabi Alonson, në një skenë që vlejti më shumë se çdo deklaratë.

Ky moment merr edhe më shumë peshë duke marrë parasysh se vetëm 49 ditë më parë, marrëdhënia mes Viniciusit dhe Xabit dukej e krisur. Pas një episodi të tensionuar në “El Clásico”, gjithçka dukej e pakthyeshme. Por futbolli shpesh ofron rikthime të papritura.

Pas ndeshjes, Xabi Alonso theksoi rëndësinë e unitetit.

“Jemi të gjithë bashkë në këtë rrugë, në momentet e mira dhe në ato të vështira. Bashkimi është thelbësor. Vetëm kështu mund të përmirësohemi dhe të fitojmë stabilitet. Sot erdhëm për të fituar dhe ia dolëm. Tani mendojmë për Kupën”, u shpreh trajneri bask.

Me kalimin e ndeshjeve, stërvitjeve dhe bisedave, marrëdhëniet brenda ekipit janë forcuar. Fillimisht me përqafimin e Rodrygos dhe më pas me atë të Viniciusit, Real Madridi po tregon se po rikthen frymën e humbur.

Pavarësisht se çfarë do të ndodhë me të ardhmen e Xabi Alonsos, një gjë është e sigurt se ai ka fituar betejën e tij të parë të madhe në Madrid – mbështetjen e lojtarëve./Arbresh.info