Manuel Neuer ka vazhduar kontratën me Bayern Munich deri në vitin 2027, ka njoftuar të premten kampioni gjerman.

Dyzet vjeçari është pjesë e Bayern që nga viti 2011 dhe gjatë kësaj periudhe ka fituar plot tridhjetë e tre trofe, përfshirë dy herë Champions League. Në 597 ndeshje me “bavarezët” në të gjitha garat, ai ka mbajtur portën të paprekur në 269 raste.

Presidenti i klubit, Herbert Hainer, e ka vlerësuar Neuer si një nga portierët më të mëdhenj në historinë e klubit.

“Manuel Neuer zë një vend shumë të veçantë te Bayern. Ai është fytyra e dy brezave dhe një kapiten shembull si në fushë ashtu edhe jashtë saj”, ka deklaruar Hainer.

Bayern së fundmi u eliminua në gjysmëfinale të Champions League nga Paris Saint-Germain, por ende ka mundësi ta fitojë “dopietën” vendore. Ekipi do të përballet me VfB Stuttgart në finalen e Kupës së Gjermanisë më 23 maj.

Edhe vetë Neuer është shprehur i lumtur me vazhdimin e kontratës.

“Mora kohë për ta menduar vendimin dhe tani jam shumë i lumtur. Këtu gjithçka është në rregull dhe me këtë skuadër mund të mposhtim këdo”, ka thënë ai.

Së bashku me Neuer, kontratë të re njëvjeçare ka nënshkruar edhe portieri rezervë Sven Ulreich.

Neuer ishte për vite me radhë portieri numër një i Gjermania dhe fitoi Botërorin e vitit 2014. Ai u tërhoq nga kombëtarja pas EURO 2024, megjithatë mediat gjermane kanë raportuar për një rikthim të mundshëm surprizë për Kupën e Botës muajin e ardhshëm.