Myrto Uzuni, futbollisti i talentuar beratas, që kulmoi me pareaqitjen e tij te Laçi në Kategorinë Superiore, sezonin e kaluar dhe tri ndeshjet e para të këtij kampionati, është prezantuar sot te klubi i tij i ri, Lokomotiva Zagreb. Një hap cilësor në karrierën e tij, që premton shumë, nisur nga potenciali që ka.

Në faqen zyrtare në internet të klubit kroat, që është “satelit” i Dinamos së Zagrebit, njoftohet si vijon: “Myrto Uzuni është një futbollist i ri Lokomotive! Shqiptari 22-vjeçar vjen nga KF Laci, duke luajtur në pozicionin e krahut dhe qendërsulmuesit”.

“Jam shumë i emocionuar që kam ardhur te Lokomotiva! Kam dëgjuar shumë për klubin nga ish-lojtarët e Lokomotiva nga Shqipëria. E di që këtu bëhet një punë e madhe me lojtarët e rinj. Falënderoj klubin për angazhimin, unë do të bëj çmos për të kontribuar në suksesin e Lokomotivës”, – ka thënë Uzuni në ceremoninë e prezantimit në Kroaci.

Ndërkohë, në faqen e vet zyrtare në Facebook, Myrto Uzuni ka bërë disa falenderime për këtë transferim: “Sot është një ditë që do e mbaj mend në jetën time, sepse fillon një etapë e re në karrierën time. Jam krenar që jam pjesë e NK Lokomotiv Zagreb. Dua të falenderoj familjen time në radhe të pare, që më kanë mbështetur në çdo moment. Falënderoj presidentin Pashk Laska dhe tifozat e KF Laçit, menaxherin tim Franci Bode dhe profesor Besnik Prengën, që më ndihmuan të jem sot këtu!”