Ish-ndihmësi i Alex Fergusonit në Manchester Unitedit, Mike Phelan, mendon se trajneri i tanishëm i “Djajve të kuq”, Jose Mourinho, duhet të rri i heshtur dhe t’i shmangë konfliktet pasi që situata e tij në klub është delikatë.

Që nga përfundimi i sezonit të kaluar, klubi anglez është përmbytur nga spekulimet se brenda klubit ka shumë probleme. Këto spekulime i kanë nxitur edhe vetë trajneri dhe disa lojtarë të klubit me deklaratat e tyre të dhëna për media, siç janë deklaratat për mosmarrëveshje mes Mourinhos dhe bordit drejtues të klubit, si dhe deklaratën e Pogbas pas interesimit të Barcelonës për të.

Pas disfatës që Manchester Unitedi pësoi ndaj Brightonit me rezultat 3-2, e ardhmja e portugezit është vënë në dyshim, me spekulimet se pasuesi i tij mund të jetë ish-trajneri i Real Madridit, Zinedine Zidane.

Ish-ndihmësi i trajnerit Sir Alex Ferguson në Manchester United, Mike Phelan, mendon se Mourinho është duke i nxitur edhe më shumë këto spekulime me veprimet e tij.

“Çdo trajner në çfarëdo institucioni të madh ndërkombëtar, si Manchester Unitedi, ka një rol të madh dhe përgjegjësi që t’i dërgojë mesazhet e duhura në publik. Nuk duhet të shmangësh çdo konflikt, por duhet të mbash një qëndrim i cili i përshtatet traditës së institucionit ku po punon”, ka thënë Phelan.

“Këtë gjë mund ta bësh duke e mbajtur një qëndrim të përshtatshëm dhe të vazhdon ta bësh punën tënde. Por, ai [Mourinho] është një karakter plotësisht i ndryshëm dhe ai e shpreh veten në një mënyrë plotësisht të ndryshme”.

“Ai ka mundësi t’i thotë gjërat dhe ka mundësi t’i mbajë ato për vete. Ai e zgjedh njërën mënyrë dhe për shkak të kësaj, ka gjithmonë pasoja për shkak të asaj që tregon”.