Luka Modric ka thënë se dashuria për Milan kishte lindur që në fëmijëri, kohë kur e ndiqte me pasion Serie A dhe kishte si idhull Zvonimir Boban, legjendën kroate të kuqezinjve.

Për këtë arsye, vendimi për të pranuar ofertën e klubit nga Milano ishte i lehtë për të, pavarësisht interesimit nga ekipe të tjera.

Mesfushori kroat tashmë është zyrtarizuar si futbollisti më i ri i Milanit, duke nënshkruar një kontratë njëvjeçare me mundësi vazhdimi deri në vitin 2027.

“Si fëmijë, e shikoja shumë Serie A dhe Milani ishte ekipi im i preferuar, sepse idhulli im, Boban, ishte atje. Pata oferta të tjera, por kur Milani më telefonoi, ishte e qartë për mua. E doja që në fillim”, ka deklaruar Modric në intervistën e tij për “Milan TV”.

Modric ka zbuluar edhe detaje nga bisedimet që paraprinë transferimin e tij. “Më bëri përshtypje fakti që drejtori sportiv Tare erdhi në Kroaci për të më prezantuar projektin. Ishte shumë e rëndësishme, më tregoi se sa shumë i interesonte dhe Milani është një nga klubet më të mëdha në Evropë”, ka theksuar ai.

Mesfushori kroat ka theksuar se ambiciet e tij përputhen me madhështinë e klubit: “Milani nuk mund të kënaqet me mediokritetin; ne duhet t’i vendosim vetes objektiva më të larta të mundshme: të fitojmë tituj dhe të konkurrojmë me ekipet më të mira në botë”, është shprehur ai.

Modric është ndalur edhe te motivimi personal: “Dua të sjell urinë time për të fituar, të ndihmoj shokët e mi të ekipit në çdo mënyrë dhe të punoj shumë për të fituar vendin tim në ekip. Nuk është kurrë e lehtë, duhet të punosh shumë dhe të luftosh. Gjithmonë them se gjëja më e rëndësishme për mua është dashuria për lojën dhe për futbollin. Ende e kam atë zjarr brenda meje. Kjo është ajo që më motivon”, ka thënë ai.