Trajneri i Manchester Unitedit, Ole Gunnar Solskjaer, e ka hedhur poshtë çfarëdo mundësi që mesfushori Paul Pogba të kthehet në Juventus.

Thashethemet se Pogba do ta lërë Unitedin dolën përsëri në sipërfaqe gjatë ndeshjeve të Kombëtareve, pasi francezi e pranoi se është ëndërr e çdo futbollisti të luajë për Real Madridin, duke e alarmuar Juventusin.

Megjithatë, Solskjaer ka thënë të hënën për BBC se Pogba nuk kishte folur për veten kur i kishte bërë ato deklarata.

“Ai nuk foli për veten. Ai tha se çdo kush do të donte të luajë për Real Madridin”, tha Solskjaer për BBC.

“Paul është i lumtur këtu dhe po luan mirë. Ai do të jetë pjesë e madhe e skuadrës. Ne duam ta ndërtojmë ekipin përreth tij dhe kjo nuk ka ndryshuar”, shtoi ai.

26-vjeçari i ka shënuar nëntë gola që prej se norvegjezi e zëvendësoi Jose Mourinhon në dhjetor. /Gazeta Express/