Llapi ditën e djeshme ka filluar të angazhohet për sezonin e re, duke vazhduar kontratën edhe për dy sezone tjera me gardianin e portës, Ilir Avdyli.

Teksa gjatë ditës së sotme skuadra e udhëhequr nga Tahir Batatina, ka njoftuar se ka rinovuar kontratën edhe me ‘dirigjentin’ e mesfushës, Besar Musolli, shkruan Arbresh.info.

Musolli dhe Llapi kanë gjetur gjuhën e përbashkët dhe mesfushori do të jetë pjesë e nënkampionëve të Kosovës edhe për dy vite tjera.

Kështu ka bërë të ditur skuadra e Llapit përmes një postimi në rrjetin social Facebook.

Musolli këtë sezon është paraqitur në 29 ndeshje me skuadrën llapjane ku ka qenë një ndër më të mirët në suksesin e bardhekaltërve.

Teksa është shprehur i lumtur pas rinovimit.

“Normalisht që jam i kënaqur me vazhdimin e kontratës. Ishte sezoni im i parë pas shumë vitesh larg vendlindjes por që mund të them se ishte mjaft i suksesshëm si për mua ashtu edhe për ekipin. Jam pritur mirë dhe jam ambientuar shpejt. Tifozët nuk arritëm t’i shpërblenim me titullin kampion për mbështetjen e tyre të zjarrtë por u premtojmë angazhim maksimal për të korrur sa më shumë suksese në Europa Ligë dhe sezonin vijues të Superligës”, ka thënë Musolli.

Llapi bënë të ditur se klubi i tyre është duke punuar intensivisht në prurje të reja dhe rinovime tjera që të jenë të gatshëm për sezonin e ri.

Kujtojmë se llapjanët do të përfaqësojnë Kosovën në kualifikimet për Europa League./Arbresh.info/