LeBron James u bë lojtari i parë që merr pjesë në 23 sezone radhazi të NBA-së, kur zbriti në parket për Los Angeles Lakers.

40 vjeçari, i cili kishte munguar në 14 ndeshjet e para të sezonit për shkak të dhimbjes së nervit shiatik, kontribuoi me 11 pikë, 12 asistime dhe tre kërcime në 30 minuta, në fitoren 140–126 në shtëpi ndaj Utah Jazz.

James, që ka rekordin e pikëve në historinë e NBA-së, theu edhe rekordin e Vince Carter për 22 sezone radhazi, ndërsa dy treshet e shënuara e ngjitën atë mbi Reggie Miller në vendin e gjashtë të listës së përgjithshme të realizuesve më të mirë nga distanca.

Bashkëlojtari i tij, Luka Donçiç ishte lojtari më i mirë i ndeshjes me 37 pikë dhe 10 asistime në triumfin ndaj Jazz.

Austin Reaves shënoi 26 pikë për Lakers, ndërsa për Utah, Keyonte George dhe Lauri Markkanen realizuan 34 respektivisht 31 pikë.

Fitorja e ngjit Lakers në vendin e katërt të Konferencës së Perëndimit, ndërsa Jazz mbetet në vendin e 10-të.