Lautaro Martinez ende nuk ka filluar bisedimet me Inter për vazhdimin e kontratës, dhe të luajturit me Lionel Messin, është një ëndërr që iu bë realitet, thotë agjenti i futbollistit, Beto Yaque.

Shënuesi i 16 golave në 43 paraqitje në të gjitha garat në sezonin e kaluar, ishte i lidhur me Barcelonën verën e kaluar.

“Kishte thashetheme, të gjithë dukej se ishin të gatshëm të nënshkruanin me atë, por nuk kishte asgjë konkrete në fund të fundit”, ka deklaruar agjenti i futbollistit, përcjell lajmi.net.

“Ai ka edhe dy vjet në kontratën e tij me Interin dhe ne nuk jemi ulur të flasim për një rinovim ende”.

Lautaro ishte startues në fitoren 1:0 të Argjentinës kundër Ekuadorit mbrëmjen e kaluar dhe lojtari shpreson të jetë pjesë e skuadrës në Kupën e Botës së vitit 2022.

“Ai bëri debutimin e tij në eliminatoret e Kupës së Botës dhe ishte e rëndësishme për të”.

“Kalimi në Evropë e ka ndihmuar të përmirësohet dhe ai po vendoset mirë në ekipin kombëtar. Për të, është një ëndërr të luaj përkrah Lionel Messit”.