Ish-mesfushori i Real Madridit, Toni Kroos, ka mbrojtur reagimin e zemëruar të Vinícius Júnior pas zëvendësimit në “El Clásico”, duke thënë: “As mua nuk më ka pëlqyer kurrë të zëvendësohem,” por pranoi se anësori mund të dëshirojë të kishte kontrolluar më mirë nervat e tij.

Vinícius u pa dukshëm i mërzitur pasi trajneri Xabi Alonso e largoi nga loja në minutën e 72-të të fitores 2-1 të Madridit ndaj Barcelonës të dielën në LaLiga.

Ai e vuri në dyshim vendimin që gjatë lojës dhe më pas doli drejt e në dhomat e zhveshjes.

Sipas “ESPN”, marrëdhënia mes Viníciusit dhe Alonsos është e tensionuar, dhe lojtari planifikon të bisedojë me bashkëlojtarët në ditët në vijim, përpara se të takohet me trajnerin kur skuadra të rikthehet në stërvitje të mërkurën.

“As mua nuk më ka pëlqyer kurrë të zëvendësohem,” tha Kroos në episodin e fundit të podcastit të tij “Einfach mal Luppen”.

“Por për të qenë i drejtë, unë kurrë nuk kam shkuar direkt në dhomat e zhveshjes… Gjithmonë është e lehtë të gjykosh nga jashtë. Por askush, përveç atyre që janë aty, duke luajtur një Clásico para 80 mijë njerëzve me rezultatin 2-1, nuk e di si është. Gjëja e fundit që dëshiron është të dalësh nga loja. Askush që e gjykon [Vinín] nuk mund ta imagjinojë. Shumica thjesht nuk mund ta vendosin veten në vendin e tij… Me pak qetësi, ai ndoshta do të mendojë: ‘Duhej ta kontrolloja pak më shumë zemërimin tim.’ E kuptoj plotësisht. Nuk jep përshtypjen më të mirë, por është një situatë emocionale e jashtëzakonshme”, vazhdoi ai.

Vinícius më vonë u kthye në stol për fundin e ndeshjes në “Bernabéu” dhe mori karton të verdhë në momentet kaotike pas fishkëllimës së fundit, kur disa lojtarë – përfshirë Dani Carvajal – u përplasën me Lamine Yamal, pas komenteve që lojtari i Barcelonës kishte bërë javën e kaluar kundër Realit.

Alonso e ka lënë jashtë formacionit titullar brazilianin në tri raste këtë sezon, me Vinin që ka shënuar pesë gola dhe ka dhënë katër asistime deri tani në sezonin 2025–26.

“Do të flasim për këtë,” tha Alonso të dielën, kur u pyet për reagimin e Viníciusit.

“Do të fokusohem në gjërat pozitive të ndeshjes dhe te ato që Vini bëri mirë… Nuk dua të zhvendos vëmendjen nga ajo që është e rëndësishme. Vini dha shumë”, shtoi ai.

“ESPN” kishte raportuar më herët se njerëzit pranë Viníciusit besojnë se Alonso nuk është adhurues i tij, dhe se marrëdhënia mes tyre është dëmtuar, megjithëse nuk është prishur plotësisht.

Pas fitores në “Clásico”, Alonso u dha lojtarëve të Realit dy ditë pushim. Vinícius i kaloi ato në Monako, pasi kishte darkuar me miqtë e tij, ku drama e ndeshjes nuk ishte temë diskutimi.

Ndërkohë, negociatat për kontratën e re të Viníciusit – e tanishmja skadon në vitin 2027 – janë pezulluar, pasi oferta fillestare e klubit nuk përfshinte kërkesën e përfaqësuesve të tij për 10 milionë euro bonuse, përveç pagës vjetore prej 20 milionë eurosh.