Milan dhe Inter kanë ndarë pikët në sfidën “Derby della Madonina” në kuadër të xhiros së 23-të në Serie A.

Ndeshja u mbyll me rezultat 1-1 me Interin që i shpëtoi humbjes në momentet e fundit të sfidës, shkruan Arbresh.info.

Pikërisht “Nerrazurrët” e nisën takimi më mirë dhe krijuan raste shënimi.

Madje, shënuan në minutën e shtatë me Dimarcon por goli u anulua. Një tjetër realizim gjyqtari anësor ia mohoi skuadrës së Inzaghit, të cilët e shënoi Lautaro Martinezi në minutën e 33-të.

Interi po krijonte, por një gafë e Calhanoglut në mesfushë i kushtoi shumë, pasi në një kundërsulm të shpejtë Milani shënoi përmes Tijani Reijnders, në fundin e pjesës së parë.

Edhe në pjesën e dytë, Interi vazhdoi ofensivën por assesi të gjente golin.

Zikaltri s’u dorëzuan dhe shtuan sulmet në çastet e fundit dhe më në fund në minutën e tretë shtesë pas një tollovie në mbrojtjen e Milanit, më së miri u gjend de Vrij i cili realizoi për barazim.

Pas këtij goli nuk kishte kohë më dhe derbi përfundoi baras.

Në 22 ndeshje të luajtura, Interi ka 51 pikë dhe është i dyti, kurse Milani ka 35 sosh në pozitën e tetë./Arbresh.info