Herolind Shala ishte njëra prej pesë mungesave të rëndësishme të Përfaqësueses së Kosovës në ndeshjet e shtatorit, ndaj Republikës Çeke dhe Anglisë. Mirëpo, mesfushori kosovar është duke u rikuperuar nga lëndimi dhe pritet të jetë i gatshëm për ndeshjen e vlefshme të tetorit ndaj Malit të Zi, në kualifikimet e Euro 2020

Herolind Shala, së bashku me Milot Rashicën, Benjamin Kolollin, Hekuran Kryeziun e Arbër Zenelin, ishte në mesin e pesë mungesave të rëndësishme të Përfaqësueses së Kosovës në ndeshjet e shtatorit, ndaj Republikës Çeke dhe Anglisë.

Mirëpo, mesfushori kosovar pritet të jetë i gatshëm për duelet e tetorit, në miqësoren ndaj Gjibraltarit dhe për ndeshjen e rëndësishme kualifikuese për Euro 2020 ndaj Malit të Zi, e cila do të zhvillohet më 14 tetor.

Shala i ka postuar në Instastory dy video ku shihet duke ushtruar në palestër, mbi të gjitha në qëndrueshmëri dhe në forcimin e muskulaturës.

Krahas tij, edhe Hekuran Kryeziu po punon intensivisht për t’u rikthyer sa më shpejtë, nëse jo në ndeshjet e tetorit, bile në ato të nëntorit.

Edhe Benjamin Kololli pritet të jetë i gatshëm për “Dardanët” në duel me malazezët, njëjtë si Milot Rashica, i cili është rikthyer në aksion.

Kosova e synon kualifikimin në Euro 2020, qoftë përmes kualifikimeve apo edhe nëpërmjet Ligës së Kombeve /Express