Golden Eagle Ylli mposht Prishtinën edhe në ndeshjen e tretë dhe kalon pa problem në finale

21:30 | 14 Maj 2022

Golden Eagle Ylli ka shënuar fitore ndaj Sigal Prishtinës me rezultat 56:75 (11:18, 17:17, 11:25, 17:15), duke kaluar në finale të Play-offit, pasi në tri takimet gjysmëfinale ishin më të mirë se prishtinasit. Sfidën e parë e fituan 73:48, ndërsa të dytën 79:70.

Jan Palokaj shënoi pikët e para për vendasit, por mysafirët kundërpërgjigjen me një seri prej 0:11. Më pas kryeqytetasit u këndellen paksa, ku çereku i parë përfundon 11:18.

Therandasit vazhduan me lojë të mirë në periudhën e dytë, ku me tetë pikë radhazi kaluan në epërsi prej 15 pikësh, 11:26, por dalëngadalë prishtinasit ngushtojnë shifrat, duke shkuar në pushim me rezultat 28:35.

Kampionët ishin të pamëshirshëm në periodën e tretë, ku ngritën epërsi deri në 21 pikë, 33:54, dhe faktikisht siguruan fitoren në këtë pjesë, ndërsa rezultati në semafor pas 30 minutash ishte 39:60.

Në dhjetë minutat e fundit Ylli kontrolloi lojën dhe pavarësisht tri shënimeve për tri pikë nga Muhamedali Janjeva, fituesi nuk u vë në diskutim, ku Golden Eagle Ylli në fund triumfoi 56:75.

Te Prishtina, Jenjava shënoi 13 pikë, ndërsa Jetmir Zeqiri 11, kurse te Ylli u dalluan Chris Harris me 14 pikë e shtatë kërcime dhe Dajuan Graf me 15 pikë.

 

Lajmet më të lexuara