Fillimi i ditës në programin La Tribu solli deklaratat më të forta të gazetarit spanjoll Roberto Gómez, i cili kritikoi ashpër mënyrën se si, sipas tij, po trajtohen futbollistët e Real Madridit nga mediat dhe opinioni publik.

Gómez theksoi se disa prej lojtarëve, si Vinicius dhe Valverde, po përballen me një fushatë të padrejtë sulmesh.

“Po i nënshtrojnë një përçmimi brutal… që gjoja nuk vrapojnë, që nuk janë profesionistë”, u shpreh ai, duke shtuar se këto komente po krijojnë “një imazh shumë të keq” për futbollistët madrilenë.

Polemika e videove taktike: “Absurditet i pastër”

Gazetari foli edhe për debatin rreth videove taktike të përgatitura nga stafi teknik. “Tani del që lojtarëve nuk u pëlqejnë videot tre minutëshe dhe duhet të jenë vetëm 45 sekonda”, tha ai me ton kritik, duke e cilësuar “absurde” narrativën që sugjeron mungesë përkushtimi nga ana e lojtarëve.

Xabi Alonso në qendër të kritikave: “Ai është përgjegjësi kryesor”

Gómez rikujtoi se përgjegjësia për drejtimin e projektit bie gjithmonë mbi trajnerin. “Situata është e Xabi Alonsos. Ai është përgjegjësi kryesor”, theksoi ai, i habitur që një pjesë e tifozëve dhe e mediave po i drejtojnë më shumë akuza futbollistëve sesa trajnerit.

Sipas tij, brenda klubit ekziston pakënaqësi prej disa javësh: “Në Real Madrid filluan të dyshonin pas Botërorit të Klubeve… Nuk janë të kënaqur”, u shpreh Gómez. Ai shtoi se presioni ndaj trajnerit është i madh: “E ka ndeshjen vendimtare në Bilbao, pastaj në Bernabéu dhe më pas kundër Manchester Cityt.”