Garcia: E kam thënë që Cristiano ka qenë gjithmonë idhulli im

15:02 | 2 Korrik 2025
D.H

Gonzalo Garcia është kthyer në një fenomen në katër ndeshjet e para të Real Madridit në Kupën e Botës për Klube.

Ai ka shënuar tre gola dhe një asistim, duke qenë vendimtar edhe në sfidën e mbrëmshme ndaj Juventusit, shkruan Arbresh.info.

Garcia realizoi golin e vetëm në këtë sfidë, i cili e dërgoi Realin në çerekfinale të këtij kompeticioni.

Pas ndeshjes ai foli për ecurinë e tij dhe ndër të tjera tregoi edhe idhullin e tij.

“Epo, e kam thënë që Cristiano ka qenë gjithmonë idhulli im. Kam pasur disa modele gjatë gjithë karrierës sime, por nëse do të më duhej të zgjidhja një, ai patjetër do të ishte Cristiano”, ka thënë sulmuesi 21-vjeçar.

Real Madridi ndeshjen e radhës e luan me 5 korrik ndaj Dortmundit në çerekfinale dhe nëse potencialisht kualifikohet më tutje, do të përballet me fituesin e çiftit Bayern – PSG./Arbresh.info