Juventusi është dënuar sërish nga Federata Italiane e Futbollit.

Komisioni Disiplinor vendosi të mbyllë tribunën jugore të “Allianz Stadium”, ku ndodhen tifozët më të zjarrtë të Juventusit, pasi u dëgjuan thirrje raciste gjatë ndeshjes gjysmëfinale të Kupës kundër Interit të martën mbrëma.

“Cak” i tifozëve ishte sulmuesi i “Nerazzurrëve”, Romelu Lukaku, të cilin e fyen në baza racore gjatë festës së tij te goli i barazimit në kohën shtesë, njoftojnë mediat italiane.

Kështu, pjesa e tribunës jugore do të mbyllet plotësisht për ndeshjen e radhës të planifikuar kundër Napolit më 23 prill në Serinë A.

“Gjatë minutave të 35-të dhe 49-të të pjesës së dytë, tifozët e Juventusit që ndodheshin në pjesën e poshtme “Tribune Sud” bërtitën një sërë ofendimesh dhe britmash duke iu referuar diskriminimit racor ndaj lojtarit të Interit, Romelu Lukaku”, thuhet në komunikatë.

Lukaku u përjashtua me karton të kuq pas ndeshjes për shkak të kaosit të krijuar mes futbollistëve./lajminet