Talenti kosovar i VfB Stuttgart, Eliot Bujupi, tashmë është lojtar më i ri i Kombëtares së Kosovës.

Bujupi ishte pjesë e Kombëtares së Gjermanisë U17, por që tashmë do të vesh fanellën e ‘Dardanëve’.

Presidenti i FFK-së, Agim Ademi, përmes llogarisë së tij në Facebook, ka konfirmuar se Bujupi është anëtari më i ri i Kombëtares sonë.

Sipas Ademit, Elioti është një prej sulmuesve më përspektiv dhe golashënues i spikatur në Bundesligën U17.

“Pata kënaqësinë që sot t’ia dorëzoj fanellën e Kombëtares së Kosovës anëtarit më të ri të ekipit dardan, Eliot Bujupi. Ai është pjesë VfB Stuttgart dhe ishte anëtar i Kombëtares së Gjermanisë U17, ku u paraqit në 10 ndeshje. Elioti është një prej sulmuesve më përspektiv dhe golashënues i spikatur në Bundesligën U17. Eliotit i uroj suksese dhe mirëseardhje në Kombëtaren e Kosovës. Ardhja e tij është rezultat i kontakteve dhe vlerësimit të performancave të tij nga kordinatori i Kombëtares, Isa Sadriu”, ka thënë Ademi.