Pas finales së Kupës së Kombeve të Afrikës (AFCON), Konfederata Afrikane e Futbollit (CAF) ka publikuar një sërë dënimesh të rënda, me gjoba që në total arrijnë pothuajse 1 milion paund (rreth 914 mijë £), për shkak të kaosit dhe incidenteve serioze që shoqëruan ndeshjen finale mes Senegalit dhe Marokut.

Fitorja historike e Senegalit ndaj nikoqirëve marokenë u errësua nga dhuna, polemikat, braktisja e përkohshme e fushës nga lojtarët dhe një penallti e humbur në stilin “panenka”, duke e kthyer këtë finale në një nga më të paharrueshmet – dhe më kaotiket – në historinë e AFCON-it.

Dënime të ashpra për Senegalin

Trajneri i Senegalit, Pape Thiaw, është dënuar me pezullim prej pesë ndeshjesh dhe një gjobë prej 72 mijë paundësh, për “sjellje josportive”, pasi udhëzoi lojtarët e tij të largoheshin nga fusha në shenjë proteste, pasi Marokut iu dha një penallti në vazhdime, vetëm pak minuta pasi arbitri kishte refuzuar një penallti për Senegalin.

Federata e Futbollit e Senegalit është gjobitur me 445 mijë paund, për sjelljen e ekipit dhe të një pjese të tifozëve të saj, pas përleshjeve me forcat e sigurisë në stadiumin Prince Moulay Abdellah. Situata doli jashtë kontrollit, me qindra policë antidrogë që mezi arritën të menaxhonin tifozët e revoltuar, ndërsa lojtarët u përfshinë në tensione serioze në vijën anësore.

Po ashtu, Iliman Ndiaye (Everton) dhe Ismaïla Sarr (Crystal Palace) janë dënuar me nga dy ndeshje pezullim.

CAF ka goditur edhe Marokun me 228 mijë paund gjobë, për sjelljen skandaloze të fëmijëve mbledhës të topave, të cilët tentuan vazhdimisht dhe në mënyrë agresive t’i merrnin peshqirin portierit rezervë të Senegalit. Në këtë dënim përfshihet edhe sjellja e stafit dhe lojtarëve marokenë në zonën e VAR-it, si dhe përdorimi i lazerëve nga tifozët në tribuna për të shpërqendruar lojtarët e Senegalit.

Ankesa e Marokut për të përmbysur rezultatin përfundimtar, pas ndërprerjes 17-minutëshe të ndeshjes për shkak të largimit të Senegalit nga fusha, u hodh poshtë nga CAF.

Kapiteni Achraf Hakimi është dënuar me dy ndeshje pezullim, njëra prej të cilave me kusht për një vit, ndërsa Ismael Saibari mori tre ndeshje pezullim dhe gjobë 72 mijë paund. Të dy lojtarët u ndëshkuan për tentativat e tyre për t’i marrë peshqirin portierit Edouard Mendy, sjellje e cilësuar si josportive./Arbresh.info