Bellingham e Camavinga ftohen për ndeshjen e Ligës së Kampionëve

16:45 | 15 Shtator 2025
D.H

Real Madridi do të luaj nesër ndeshjen e Ligës së Kampionëve ndaj Marseilles.

Trajneri, Xabi Alonso ka publikuar sot listën e lojtarëve të ftuar për këtë sfidë, shkruan Arbresh.info.

Kësaj liste i shtohen Jude Bellingham e Eduardo Camavinga, të cilët nuk luajnë që nga fillimi i sezonit. I pari për shkak të një operimi në shpatull, kurse francezi arsye dëmtimi.

Mbetet të shihet nëse do të kenë minutat e para në sezonin e ri nesër dyshja e mesfushës, edhe pse gjasat janë të vogla sidomos për Jude Bellingham, i cili pati një rikthim rekord në stërvitje.

Bellingham fillimisht u lajmërua se do të mungojë deri në mesin e tetorit, gjithnjë sipas raportimeve të mediave spanjolle.

Mirëpo anglezi është rikuperuar dhe tashmë do të jetë gati për sezonin e ri. Reali në këtë sfidë do të jetë pa Rudigerin, Mendyn dhe Endrickun.

Madrilenët e kanë nisur sezonin e ri për mrekulli ku në katër ndeshjet e para në La Liga kanë katër fitore.

Nesër gjithashtu kërkojnë ta nisin edhe edicionin e ri në Ligën e Kampionëve me fitore ndaj gjigantit francez.

Kjo ndeshje luhet me fillim nga ora 21:00 në “Santiago Bernabeu”./Arbresh.info