Trajneri i Real Madrid, Alvaro Arbeloa, ka dalë në mbrojtje të Kylian Mbappes pas kritikave që sulmuesi francez mori për pushimet e tij në Sardenjë, gjatë kohës që është i lënduar.

Mbappe pësoi një lëndim muskulor në ndeshjen ndaj Real Betis dhe mungoi në fitoren 2-0 të madrilenëve në udhëtim ndaj Espanyol.

Pavarësisht suksesit, Reali mbetet 11 pikë prapa Barcelona në garën për titull, ndërsa “El Clasico”-ja e fundjavës pritet të jetë vendimtare, me francezin që pritet të mungojë.

Në konferencën pas ndeshjes, Arbeloa u pyet për mungesën e Mbappe-s në stadium, pasi lojtari kishte udhëtuar në Itali me partneren e tij, gjë që u kritikua nga mediat.

“Gjithçka që ka të bëjë me lojtarët e lënduar menaxhohet nga stafi mjekësor i klubit,” deklaroi Arbeloa.

“Ata vendosin kur një lojtar duhet të jetë në Valdebebas dhe kur jo.”

Ai shtoi se situata të tilla janë pjesë e procesit të rikuperimit.

“Nëse stafi jep dritën jeshile, atëherë çdo gjë është në rregull. Ne ndjekim gjithmonë rekomandimet e tyre”, theksoi Arbeloa.