Emri i Cristiano Ronaldos vazhdon të krijojë rrëmujë, ndërsa së fundmi është folur për largimin e tij nga Juventusi, por bashkëlojtari i tij te Portugalia, Bruno Alves, beson se pesë herë fituesi i “Topit të Artë” do të qëndrojë në Torino për një sulm të fundit në Ligën e Kampionëve.

Lavdia evropiane nuk ka ardhur për sulmuesin portugez me klubin italian edhe pse ishte arsyeja pse ai u ble.

Mbrojtësi veteran Alves, i cili ka luajtur shumë me Ronaldon dhe e kanë fituar së bashku Euro 2016, u deklarua për Tuttosport për të ardhmen e Ronaldos: “Unë nuk kam folur për këto gjëra me të”.

“Ndjenja ime është se në fund ai do të qëndrojë në Juve sepse ai ka ende diçka për të bërë: ta fitojë Scudetton dhe të provojë një sulm të fundit në Ligën e Kampionëve”.

“Cristiano gjithmonë dëshiron të dëshmojë veten, ai është një fitues i lindur”, deklaroi Alves.

I pyetur se çfarë mund të presim nga Ronaldo në sezonin 2021-22, Alves tha: “Ajo që të gjithë e dimë: një fenomen që garanton 30-40 gola, edhe në moshën 36 vjeç”.

“Cris është një kampion, një fitues dhe gjithmonë bën gjëra të jashtëzakonshme, por ai ka nevojë për ekipin që ta mbështesë atë. Nuk mund të mendohet se vetëm ai është i mjaftueshëm”, deklaroi veterani portugez. /Telegrafi/