Policia e Fierit ka zbuluar një banesë trekatëshe ku kultivohej kanabis me anë të llambave dhe ka arritur të arrestojë tre persona.

Mes të arrestuarve janë pronari i vilës 3-katëshe, shtetasi E.M. alias Xh. G., 44 vjeç, banues në Dërmënas, Fier, i cili kishte përshtatur pesë dhomat e njërit kat për kultivimin e bimëve narkotike me anë të llambave që furnizoheshin me lidhje të paligjshme të energjisë elektrike.

Në burg përfunduan edhe faturisti dhe elektricisti i Operatorit të Shpërndarjes së Energjisë, respektivisht shtetasit K.G., 40 vjeç, dhe B.F., 47 vjeç, të dy banues në Fier, për veprën penale “Shpërdorimi i detyrës”.

Gjatë operacionit janë sekuestruar 181 bimë narkotike të cilat ishin kultivuar në vazo që u gjetën brenda ambienteve të përshtatura me llamba, dhjetëra llamba dhe pajisje të tjera elektrike që ishin instaluar në pesë ambientet e banesës.

Gjithashtu, u bë bllokimi i vilës trekatëshe në ambientet e së cilës ishin kultivuar bimët narkotike.

“Vijon puna për identifikimin dhe kapjen e personave të tjerë të dyshuar të përfshirë në këtë veprimtari kriminale. Në bashkëpunim me Prokurorinë, vijon dhe hetimi pasuror ndaj pronarit të vilës, shtetasit E. M”, njofton policia.