Policia e Elbasanit ka shoqëruar një tjetër person në lidhje me vrasjen e Mondi Mëhallës, ngjarje e ndodhur një natë më parë në qytetin e Elbasanit.

Sipas burimeve, policia po ushtron kontroll në një banesë në Lezhë, e cila dyshohet se i përket personit të ndaluar. Hetimet e para sugjerojnë se ky individ mund të ketë përdorur më herët automjetin tip “Audi”, i cili u gjet i djegur pas ngjarjes.

43-vjeçari Edmond Hyka alias Mondi Mëhalla u qëllua për vdekje mbrëmjen e së dielës (30 nëntor), teksa sapo kishte dalë nga zyra e karburantit të tij. Ai u qëllua pasi ishte futur në automjetin tip Range Rover, nga një makinë tip Audi e zezë e cila iu afrua duke e qëlluar brenda mjetit. Pas ngjarjes, autorët u larguan në drejtim të Librazhdit, ndërsa ende nuk janë identifikuar nga policia. Mëngjesin e sotëm, në fshatin Mirakë të Librazhdit u gjetën automjeti i djegur dhe arma që dyshohet se janë përdorur nga autorët.

Viktima Edmond Hyka rezulton me precedentë penalë të mëparshëm në Itali dhe Shqipëri. Ai dyshohet se ka qenë pjesë e një organizate kriminale në shtetin italian për shitje të lëndëve narkotike. Gjithashtu dy vite më parë, ai është shoqëruara nga Policia e Elbasanit për armëmbajtje pa leje, ndërsa pas kontrollit që i është bërë mjetit, i janë gjendur dhe shkopa bejsbolli në bagazhin e makinës.

/rtsh.al/