Kryeministri i Shqipërisë, Edi Rama ndau sot momente të vizitës së presidentit të Emirateve të Bashkuara Arabe, Sheikh Mohamed bin Zayed Al Nahyan, në Tiranë.

Ai u nderua në një ceremoni zyrtare mirëseardhjeje në Pallatin e Brigadave dhe më pas zhvilloi një takim kokë më kokë me kryeministrin Edi Rama.

Në kuadër të kësaj vizite u shkëmbyen marrëveshjet e nënshkruara të bashkëpunimit mes palëve, konkretisht:

– Marrëveshja Kuadër për Veprim mes Masdar, TAQA, KESH dhe OST, që u shkëmbyen mes Zëvendëskryeministres dhe Ministres së Infrastrukturës dhe Energjisë Belinda Balluku, si dhe kryetarit të MASDAR Sulltan Al Jaber.

– Letër Angazhimi për Projektin Albania Smart City ndërmjet “Presight AI Ltd” dhe Ministrisë së Brendshme e Republikës së Shqipërisë, të shkëmbyera mes Ministrit të Brendshëm Ervin Hoxha dhe Kryetarit të “Presight AI Ltd” Sulltan Al Jaber.

Marrëveshjet u shkëmbyen në një ceremoni të posaçme në praninë e kryeministrit Rama dhe presidentit të EBA, Mohamed bin Zayed Al Nahyan.

Presidenti Sheikh Mohamed bin Zayed Al Nahyan u largua nga vendi ynë rreth orës 18:00./atsh