Nënkryetari i Grupit Parlamentar të Partisë Socialiste, Taulant Balla priti në ambientet e Kryesisë së Kuvendit kryetarin e porsazgjedhur të Lëvizjes Vetëvendosje në Kosovë, Visar Ymeri dhe delegacionin që e shoqëron.

Gjatë takimit Balla e njohu kreun e Vetëvendosje me reformat e ndërmarra nga Qeveria, veçanërisht në kuadër të bashkëpunimit të ngushtë me qeverinë e Kosovës për çështje në interes të qytetarëve dhe shteteve respektive.

Nënkryetari i Grupit Parlamentar të Partisë Socialiste e vlerësoi si një hap të rëndësishëm mbledhjen e përbashkët të qeverisë së Shqipërisë dhe asaj të Kosovës ndërsa ftoi Vetëvendosjen të mbështesë vendimet e përbashkëta të dy qeverive.

Në këtë kuadër, Taulant Balla gjithashtu e njohu kreun e Vetëvendosje, Ymeri me vazhdimin e këtij bashkëpunimi dypalësh edhe në nivel parlamentar.

Balla bëri me dije se kanë nisur mbledhjet e përbashkëta të komisioneve parlamentare të të dy vendeve, Shqipërisë dhe Kosovës.

Nga ana e tij kryetari i Vetëvendosje falënderoi nënkryetarin Balla për mikpritjen dhe takimin e zhvilluar ndërsa garantoi se forca politike që ai drejton ka qenë dhe do të jetë përherë në krahë të zhvillimeve pozitive që kanë të bëjnë me rrugëtimin evropian të Kosovës.