Politikani Koço Kokëdhima ka shkruar një status në nderim të gazetarit Andrea Stefani, i cili u nda sot nga jeta, pasi vuante nga një sëmundje e rëndë.

Kokëdhima tha se ai ishte një gazetar i paepur për të vërtetën, rebel dhe se mbante qëndrime të forta për çështje të mëdha të kombit.

Statusi i plotë i Koço Kokëdhimës:

Andrea, gazetari i paepur!

Me hidhërim të thellë mësova ndarjen nga jeta të mikut tim, Andrea Stefani. Duke i shprehur ngushëllimet e mia më të sinqerta familjarëve, të afërmve, miqve dhe kolegëve të tij, dua të kujtoj bashkëpunimin tim të gjatë me Andrean.

Ai iu bashkua nismës sonë në vjeshtën e vitit 1997 për të botuar gazetën “Shekulli”. Andrea ishte kryeredaktori i parë i asaj gazete që u bë dritarja e informimit të qindra mijëra shqiptarëve, që mbajti qëndrime të forta për çështje të mëdha të kombit. Ai ishte një bashkëpunëtor shumë i mirë, një gazetar i guximshëm, një drejtues i zoti dhe një profesionist i lindur. Bashkëpunimi im me Andrean vijoi edhe më pas. Ai ishte ndër gazetarët e paktë kurajozë, parimorë e luftarakë ndaj abuzimit të pushtetit dhe të qeverive të dy dekadave të fundit. Puna e gjatë e Andreas në media ishte udhërrëfyes për shumë gazetarë të medias së shkruar dhe asaj vizive. Ne të gjithë do ta mbajmë mend Andrean si opozitarin e përhershëm, impulsiv dhe rebel, por njëherësh edhe bashkëpunëtorin e afërt e të palodhur ne projektet tona për një Shqipëri më të mirë.

Udhë të mbarë miku im!