Tre komisionerë për vettingun e policisë dorëhiqen nga puna

20:18 | 29 Shtator 2019

Tre komisionerë të vlerësimit të dosjeve për zyrtarët e lartë të policisë kanë dhënë dorëheqjen nga puna, ndërkohë ky veprim është një nga faktorët që po zvarrit procesin e vlerësimit të efektivëve. Procesi i vettingut të bluve nuk ka nisur ende ndërsa po shkëmbehen informacione mes institucioneve.

Procesi i vettingut në polici ka disa muaj që pritej të niste, por largimi i komisionerëve nga puna dhe mos koordinimi i institucioneve me njëri-tjetrin po e zvarrit prej kohësh nisjen e seancave dëgjimore.

Burimet bëjnë me dije se 3 komisionerë pranë komisionit të jashtëm të vlerësimit kanë dhënë së fundmi dorëheqjen nga procesi i vlerësimit të dosjeve të punonjësve të policisë. Fenomeni i largimit nga puna të punonjësve u ngrit dhe nga kryetarja e komisionit Ana Kapaj, gjatë raportimit pranë komisionit të sigurisë.

Komisioni i jashtëm i vlerësimit në fazën e analizës së dosjeve për drejtuesit e lartë të policisë ka kërkuar informacion dhe pranë sindikatës së policisë.

Sadetin Fishta: Në përputhje me këto raste, me dokumente që vërtetojnë çdo shkelje të këtyre drejtuesve, ne ia adresopjme direkt komisioneve. Komisioni këto ankimime i regjistron. Ne kemi marrë përgjigje për të gjitha rastet që i kemi dërguar komisionit që këto janë futur në proces.

Sipas kreut të sindikatës së policisë, Sadetin Fishta, pranë komisionit janë dërguar informacione për raste të shkeljes së ligjit, apo dhe për largime të pa drejta nga puna.

Sadetin Fishta: Të dëmit që i kanë shkaktuar punonjësve të policisë në moszbatimin e të drejtave të punonjësve, duke futur këtu largimet kolektive nga puna, pa u konsultuar me sindikatën e policisë.

Ndërkohë është hedhur dhe shorti për zyrtarët e lartë që do të dalin para komisionit për rivlerësim në 3 kriteret. I pari është Ardian Çipa, për të vijuar me Gjovalin Lokën, Bujar Ahmetin, Arben Dashin, Fatos Ballën dhe Nuri Locën. Edhe pse prej kohesh pritet të nisin seancat e para komisionit të jashtëm të vlerësimit, ende nuk ka një datë fikse, pasi sipas autoriteteve duhet punë voluminoze dhe bashkëpunim me institucionet e tjera./oranews/

Shpërndaje në rrjete sociale

Lajmet më të lexuara