Avokati Kujtim Cakrani, njëherazi mbrojtës ligjor i ish-presidentit Ilir Meta, është dhunuar mesditën e sotme rreth orës 13:30 në ambientet e një karburanti në qytetin e Vlorës.

Sipas deklarimeve të vetë Cakranit, dy persona të rinj, të panjohur për të, e kanë sulmuar teksa ai po furnizohej me karburant. Fillimisht, ata e kanë ofenduar, ndërsa konflikti dyshohet se ka nisur pas provokimeve lidhur me një parkim, edhe pse avokati shprehet se nuk beson se ky ka qenë shkaku real i ngjarjes.

Më pas, dy personat kanë ushtruar dhunë fizike ndaj tij, duke e goditur nga pas në kokë, në momentin kur ndodhej i ulur në automjet. Si pasojë, Cakrani ka pësuar dëmtime serioze në kokë dhe është transportuar me urgjencë në Spitalin Rajonal të Vlorës, ku ndodhet i shtruar në reanimacion.

“Me njeri po bisedoja dhe njëri më goditi pas koke dhe unë nuk e pash. Më ka ndodhur në një karburant në hyrje të Vlorës. Erdhën aty provokuan dhe pastaj filluan të ofendonin dhe ky ishte i gjithë debati dhe pastaj më goditën pas koke, se unë isha ulur në makinë. Debati filloi me provokime jo pse e ke ndaluar makinën keq, ke bllokuar të gjithë rrugën. Nuk i njoh personat, por të dy ishin moshë e re”, deklaroi avokati nga shtrati i spitalit.

Burime spitalore bëjnë me dije se gjendja e tij është serioze, ndërkohë pritet mbërritja e ekspertëve mjeko-ligjorë dhe përfaqësuesve të policisë, të cilët po marrin dëshminë e tij dhe po hetojnë për zbardhjen e plotë të ngjarjes.

/rtsh.al/