Ludian Zaimi, efektivi i policisë që vrau me armë zjarri kolegun e tij mbrëmjen e sotme në ambientet e Komisariatit numër 3 në Tiranë kishte vetëm 1 vit e gjysmë që ishte futur në radhët e uniformave blu.

Ndërkohë nga ana tjetër mësohet se viktima Çaush Saliasi, kishte mbi 20 vite në polici. Mësohet se para shkrepjes së armës ka ndodhur një konflikt banal mes autorit e viktimës.

Autori ka qëlluar mbi 6 herë ndaj kolegut duke bërë që ai të ndërrojë jetë në spital. Ngjarja ndodhi rreth orës 21.20 të së hënës.

Uniformat blu dhanë një informacion zyrtar në lidhje me ngjarjen e rëndë dhe se hetimet po i kryen Agjencia e Mbikëqyrjes Policore që ndodhet në vendngjarje.

Autori i dyshuar është ndaluar dhe po kryhen të gjitha veprimet hetimore për zbardhjen e rrethanave të ngjarjes.

Në ambientet e Komisariatit nr. 3 kanë shkuar një grup i posaçëm nga Drejtoria e Përgjithshme e Policisë së Shtetit, përfshirë ekspertë të Drejtorisë së Standardeve Profesionale dhe nga Departamenti i Rendit dhe Sigurisë Publike./lapsi/