Pogradeci po përgatitet për një tjetër sezon veror me fluks të shtuar turistësh, një trend në rritje vit pas viti.

Aktualisht, qyteti dhe rrethinat numërojnë 47 subjekte në sektorin e hotelerisë, me rreth 2000 shtretër të disponueshëm për pushuesit.

Megjithatë, rritja e ndjeshme e vizitorëve, sidomos gjatë muajve korrik-gusht, ka nxjerrë në pah nevojën për zgjerimin e kapaciteteve pritëse dhe për shtimin e operatorëve që ofrojnë shërbime të strukturuara turistike.

“Kapacitetet janë të mjaftueshme por për momentin duket që është e nevojshme që të shtohen kapacitete të tjera. Interes i madh i turistëve sjell pritshmëri në rritje të kapaciteteve”, u shpreh Entela Gusho, Nënkryetare e Bashkisë Pogradec.

Pogradeci mbetet një destinacion i preferuar për shumë turistë vendas e të huaj. Për të përmbushur pritshmëritë e pushuesve, fokusi i institucioneve vendore mbetet tek rritja e cilësisë së shërbimeve dhe fuqizimi i bashkëpunimit me sektorin privat./rtsh.al/