Punonjësit e policisë që kanë shoqëruar 32-vjeçarin Lear Kurti, i cili humbi jetën një ditë më parë më Tiranë, janë pezulluar nga puna.

Burime për Euronews Albania, bëjnë me dije se punonjësit janë pezulluar deri në përfundim të hetimeve edhe pse Agjencisë së Mbikëqyrjes Policore deklaroi se punonjësit e Patrullës së Përgjithshme nuk kanë kryer shkelje.

Laer Kurtit, 32 vjeç, ndërroi jetë pasi u shoqërua në komisariatin nr.3 në kryeqytet.

Përmes një njoftimi, Agjencia e Mbikëqyrjes Policore tha se mbrëmjen e 19 tetorit, gjatë patrullimit në Rr. “Riza Çuka” në zonën e Laprakës, efektivët kanë konstatuar Laert Kurtin duke qëndruar përpara një biznesi privat, për të cilin kushtet dhe rrethanat diktonin nevojën e një verifikimi.

Në momentin kur punonjësit e Policisë, i kanë kërkuar dokumentin e identifikimit, Kurti është larguar me vrap, duke mos iu bindur thirrjeve të njëpasnjëshme të punonjësve të Policisë për të ndaluar.

Pasi ka vrapuar për rreth 200 metra, i ndjekur nga patrulla e Policisë, mes rrugicave midis rrugës “Riza Çuka” dhe “Don Bosko”, ai është kapur dhe ndaluar nga punonjësit e Policisë, vend në të cilin kanë qëndruar 7 minuta.

I riu u shoqërua në komisariat dhe hetimi paraprak del në përfundimin se ai humbi jetën për shkak se ka gëlltitur një qese me drogë, për t’iu shmangur kapjes nga policia.