Kryeministri Edi Rama do të mbledhë sot, në orën 08:30, Komitetin Ndërministror të Emergjencave Civile për të adresuar situatën e krijuar nga përmbytjet e ditëve të fundit, si pasojë e reshjeve intensive të shiut në disa zona të vendit.

Gjatë mbledhjes do të diskutohen masat që do të ndërmerren dhe hapat konkretë për mbështetjen e familjeve të prekura nga përmbytjet. Fokus i veçantë do t’i kushtohet menaxhimit të situatës emergjente dhe koordinimit të institucioneve përgjegjëse.

Po ashtu, në mbledhje do të diskutohet edhe paketa e dëmshpërblimeve, nga e cila do të përfitojnë familjet, bizneset dhe fermerët, tokat bujqësore të të cilëve janë dëmtuar nga përmbytjet.

Pjesë e takimit do të jenë edhe Ministria e Mbrojtjes, Ministria e Brendshme, Ministria e Financave, Ministria e Infrastrukturës dhe Energjisë, Ministria e Bujqësisë, si dhe përfaqësues të Agjencisë Kombëtare të Mbrojtjes Civile./rtsh