Sekretari i Përgjithshëm i Partisë Demokratike, Gazment Bardhi i përgjigjet nismës së Edi Ramës për përzgjedhjen e kandidatëve për deputetë në parlamentin e ardhshëm, teksa deklaron se shqiptarët e dinë se Ramës kandidatët e tij ia zgjedh krimi.

Në reagimin e tij përmes rrjeteve sociale, teksa publikon sërish përgjimet e publikuara nga gazeta më e madhe në Gjermani “BILD”, që denoncojnë krimin zgjedhor të socialistëve në zgjedhjet e kaluara, Bardhi shpreh habinë e tij se si Edi Rama, i frikësuari i madh nga zgjedhjet brenda partisë së tij, qenka marrë sot me procesin demokratik të përzgjedhjes së kandidatëve në PD.

“Edi Rama i frikësuari i madh nga zgjedhjet brenda partisë së tij qenka marrë sot me procesin demokratik të përzgjedhjes së kandidatëve në PD.

Ekzaktësisht i njëjti kryetar partie, që për të mbajtur Dakon me shokë në kryesinë e PS, anulloi zgjedhjet për organet drejtuese në partinë e tij. I njëjti që tallet me procesin e përzgjedhjes së deputetëve në partinë e tij duke i trajtuar ata si porte e aeroporte në 3D. Nuk ka shqiptar që nuk e di, që Edi Rama përzgjedhjen e kandidatëve në Partinë e tij e bën në bashkëpunim me krimin e organizuar. Kush e ka harruar, me poshtë gjen një provë të qartë që e ka dëgjuar e gjithë bota!”, deklaron Sekretari i Përgjithshëm i PD-së, Gazment Bardhi.