Në 25 vjetorin e rënies së komunizmit, presidenti i Republikës së Shqipërisë, Bujar Nishani, vlerësoi Lëvizjen e Dhjetorit si fillimin e një epoke të re për Shqipërinë, megjithëse liria e fituar shpeshherë ka devijuar nga standardet e demokracisë.

Zigzaget dhe problemet jo rrallë të rënda të demokracisë në vendin tonë kanë qenë dhe janë një devijim nga ëndrra. Nga dhjetori i idealeve të pastra ëndrra e demokracisë dhe integrimit vazhdon, citon oranews presidentin Nishani.

Ndaj kreu i Shtetit apeloi për të afirmuar kulturën e dialogut politik dhe për të lënë pas konfliktualitetin, që dëmton vendin në rrugën drejt përmbushjes së ëndrrës së shqiptarëve.

Nishani:Fryma e dialogut duhet të afirmohet si kulturë e jetës tonë politike dhe institucionale për të kapërcyer shfaqjet e arbitraritetet, arrogancës, megalomanisë, për të lënë pas konfliktualitetin e dëmshëm që nuk ka të përbashkët me konfrontimin civil.

Presidenti vlerësoi me Dekoratën e Flamurit ish-kryeministrin Sali Berisha, i cili tha se 25 vite pas shkëputjes nga regjimi i egër komunist ka përpjekje për të kthyer kultin e diktatorit Enver Hoxha.

Berisha:Përballemi me një përpjekje për të rikthyer kultin e Enver Hoxhës, përballemi me dekorim të xhelatëve.

Me Dekoratën e Flamurit nga Presidenti u nderuan edhe Musine Kokalari dhe Lëvizja Studentore e Dhjetorit 1990.

Në ceremoninë e organizuar në Pallatin e Brigadave ra në sy mungesa e përfaqësuesve të lartë të maxhorancës dhe ambasadorëve të BE e SHBA.