Tri janë, sipas agjencisë “Reuters”, vendet që e bëjnë momentalisht të pasigurtë çeljen e negociatave të anëtarësimit të Shqipërisë me BE-në: Franca, Holanda dhe Danimarka.

Prandaj është e paqartë, – shkruan “Deutsche Welle”, – nëse Komisioni Europian do të japë “dritën jeshile” në Samitin e BE-së në fund të qershorit, e ky dyshim qarkullon jo vetëm në qarqe të KE-së, por edhe të qeverisë gjermane.

Duke cituar përfundimet e “Reuters”, gjiganti mediatik gjerman thotë se brenda Berlinit ka zëra kritikë ndaj qëndrimit të Macronit, për të cilin thonë se nuk po e dallon rëndësinë gjeostrategjike të Ballkanit Perëndimor për stabilitetin e Europës.

Ndërsa në Bruksel thuhet se, “presidenti francez ka ndjesinë se do t’u hapte krahun djathtistëve në politikë, sepse për Shqipërinë mendohet menjëherë për kriminalitetin e organizuar”.

Edhe qeveria holandeze e argumenton qëndrimin e saj kundër me frikërat e brendshme. Komisioni Europian kërkon hapjen e negociatave me Shqipërinë dhe Maqedoninë, sepse të dyja vendet i kanë përmbushur formalisht kriteret dhe BE-ja duhet t’i qëndrojë fjalës së saj.

Por, edhe në Gjermani ka dyshime lidhur me hapjen e negociatave brenda Unionit konservator. “Reuters” thotë se Kancelarja gjermane Angela Merkel dhe ministri i Jashtëm socialdemokrat, Heiko Mass, janë megjithatë për hapjen e negociatave.

Në qarqet qeveritare kujtohet se bëhet fjalë për fillimin dhe jo përmbylljen e negociatave që zgjasin me vite./Top Channel