Ministri i Jashtëm Ditmir Bushati i ka dërguar një shkresë zyrtare Presidentit Ilir Meta mbrëmjen e djeshme, për të kërkuar plotfuqishmërinë në lidhje me nisjen e negociatave dypalëshe mes Shqipërisë e Greqisë për çështjet delikate mes dy vendeve.

Burime nga Presidenca për Gazetën Express pohojnë se kërkesa zyrtare ka ardhur në mbrëmje teksa këtë të mërkurë Presidenti Meta ka thirrur për konsulta në zyrën e tij ish Presidentin Bujar Nishani.

Gazeta Express mëson gjithashtu se përgjigja e Metës nuk do të vijë të paktën në dy ditët e ardhshme, pasi kreu i Shtetit do të konsultohet gjithashtu dhe me ish Presidentët e tjerë.

Kërkesa e Ministrisë së Jashtme vjen në një moment delikat, pas një sërë takimesh dypalëshe mes Ditmir Bushatit e homologut të tij grek Nikos Kotzias. Prej kohësh tashmë diskutohet për çështje të nxehta si heqja e ligjit të luftës, një pakt i ri detar mes dy vendeve, disa të drejta ligjore të çamëve, varrezat greke etj.

Kërkesa që i drejtohet Presidentit nga ana e qeverisë bëhet me qëllim “bekimin” ligjor të hapjes së negociatave dhe vënies së pikave mbi “i”, të cilat priten të bëhen publike në muajin e ardhshëm, kohë në të cilën dy kryeministrat Edi Rama dhe Alexis Tsipras, do të firmosin zyrtarisht një marrëveshje ku do të përfshihen të gjitha çështjet e sipërpërmenduara./Gazeta Express