Mblidhet Asambleja e PS/ Rama: Në fokus riorganizimi, e nevojshme një hapje e madhe e partisë

11:56 | 11 Shkurt 2024
K.B

Partia Socialiste ka mbledhur Asamblenë Kombëtare, punimet e së cilës kanë nisur që prej orës 11:00, teksa mbledhja zhvillohet me dyer të mbyllura.

Pak para nisjes së Asamblesë, kryeministri Edi Rama deklaroi për mediat se në fokus do të jetë riorganizimi i partisë.

Rama nënvizoi se është i vetëdijshëm se është e nevojshme një hapje e madhe e partisë.

“Për t’iu thënë që kjo është një mbledhje pune, raportimesh dhe diskutimesh lidhur me hapat e tjerë që do të ndiqen në funksion të ekipit, për ta bërë gati për fitoren e radhës. Partia Socialiste është në një proces jashtëzakonisht të rëndësishëm. Jemi shumë të vetëdijshëm që është e nevojshme një hapje e madhe e partisë, një përfshirje më e gjerë e atyre që kanë dëshirë të kontribuojnë. Kemi punë, për të bërë një analizë dhe për të marrë veprime të tjera. Riorganizim nënkupton lëvizje dhe ripozicionime”, theksoi ndër të tjera kreu i qeverisë./abcnews.al