Presidenti i Francës, Emmanuel Macron i ka dorëzuar shkrimtarit të mirënjohur shqiptar, Ismail Kadare Dekoratën e “Oficerit të Madh të Legjionit të Nderit”

Kështu bëri të ditur, kryeministri i Shqipërisë, Edi Rama me anë të një postimi në Facebook duke thënë se Franca e deshi, frymëzoi dhe e lartësoi Kadarenë, shkruan Arbresh.info.

“Pallati i Brigadave – Presidenti Emmanuel Macron i Francës, vendit që aq shumë e deshi, aq shumë e frymëzoi dhe lartësoi Ismail Kadarenë, i dorëzon shkrimtarit tonë të shquar Dekoratën e “Oficerit të Madh të Legjionit të Nderit””, shkroi Rama.

Në fjalën e tij, Macron dha vlerësimet më të larta për veprat e Kadaresë, ku veçoi romanin “Pallati i Ëndrrave”, duke u shprehur se aty u pasqyruan ëndrrat e një populli të tërë.

“Vepra juaj nuk ka humbur asgjë nga fuqia e saj. Ajo është përforcuar në kundërshtim, është ngritur peshë kundër ndalimit. Ka marrë bukurinë e guximit. Liria që i mbylli gojën, ka përshpëritje më të forta se britmat. Për këtë rol, si poet i Ballkanit, si rapsod i Europës si lajmëtor i lirisë për këtë lidhje drithëruse që ju mishëroni mes shqipërisë dhe francës kam nderin tju ngre në gradën e ligjionit të lartë të urdhrit të oficerit”, tha presidenti francez.

Kujtojmë që Presidenti Macron do të zhvillojë ditën e nesërme vizitë zyrtare në Shqipëri, gjatë së cilës do të takohet kokë më kokë me homologun e tij shqiptar, Bajram Begaj./Arbresh.info/