Kryetari aktual i Bashkisë së Shijakut Ardian Kokomani e ka lënë të nënkuptuar fare qartë se përse ai nuk do të jetë më kandidat për bashkinë.

Me daljen e përgjimeve të BILD, ku influenca e grupit kriminal të Avdylajve del akoma dhe më hapur, Kokomani i është përgjigjur pyetjes së gazetarit kur ky i fundit i ka kërkuar arsyen e moskandidimit. Kokoma iu përgjigj me një pyetje gazetarit, duke i thënë “akoma s’e keni gjetur arsyen ju”

BISEDA

Gazetari Sokolaj: Keni njohje personale me Avdylajn?

Kokomani: Unë i njoh dhe babën atij, ne njihemi, unë njoh mbi 60% të komunitetit tim, jemi banorë autoktonë të zonave të Shijakut, i njoh të gjithë, emrat edhe mund t’i ngatërroj por mbiemrat e fiseve jo.

Avdylaj ka qenë i privuar nga liria në kohën e fushatës sime elektorale, nuk kanë qenë pjesë e fushatës sime.

Gazetari: Pse ky person lobon për emrin e Ilir Ndraxhit?

Kokomani: Unë nuk jam faktor që ve dhe heq emra në listë. Janë të tjerë njerëz. Unë isha një kryetar bashkie.

Gazetari: PS ka zgjedhur një klandidat tjetër për bashkinë e Shijakut, cila ka qenë arsyeja që ju nuk u rikandiduat për zgjedhjet e 30 qershorit?

Kokomani: Po ju arsyen akoma s’e gjetët? Një arsye mund të ishte dhe kjo. Unë s’kam lidhje me asnjë nga këta, unë i shërbej qytetit tim.