Kriza politike, gazetari e thotë hapur: SHBA dhe BE do të ndërhyjnë, OSBE është e pafuqishme!

23:12 | 17 Gusht 2019
Trina Galanxhi

Gazetari Aleksander Çipa duke komentuar krizën politike që ka mbërthyer vendin prej muajsh, thotë se OSBE nuk ka fuqinë dhe autoritetin e mjaftueshëm për t’i dhënë zgjidhje.

I ftuar në Ora News, Çipa u shpreh se të vetmit që mund t’i dalin zot zgjidhjes janë SHBA dhe BE.

‘Në arsyetimin tim dhe ndjekjen logjike që i bëj kësaj krize mendoj se OSBE ka peshë të lehtë dhe autoritet të pamjaftueshëm për ti dalë zot kësaj krize që kanë krijuar palët në vend. Mendoj që kancelaritë ndërkombëtare, dy më të rëndësishmet, DASH dhe Brukseli, do të ndërhyjnë në një mënyrë jo si negociatore por autoritet për normalizimin e Shqipërisë politike, si realitet i pakrahasueshëm dhe dilematik në raport me historinë politike që kanë vendet e ish-Europës Juglindore’, tha Aleksandër Çipa.