Ish kryetarja e parlamentit Jozefina Topalli ka refuzuar të plotësojë formularin e vetëdeklarimit në PD. Sipas saj, partia nuk demokratizohet me formularë.

Ajo bën fajtor për shkatërrimin dhe përçarjen e Partisë Demokratike, liderin aktual të selisë blu, Lulzim Basha.

“Ai nuk beson në asnjë parim të partisë që lindi 3 dekada më parë,” thotë ajo për Top Channel.

“Partia nuk demokratizohet as me formularë, as me komisione. LB ka përçarë e shkatërruar PD-në. Ai nuk beson në asnjë parim të partisë që lindi 3 dekada më parë.

Në këto kushte, nëse vërtet do donte largimin e Edi Ramës, LB duhet të largohet nga kryetari i partisë. Me një drejtim të ri të gjithë do bashkoheshin realisht pa formularë dhe pa komisione, dhe Rama nuk do të kishte më shans për të drejtuar vendin”.

Refuzimi sjell automatikisht përjashtimin e saj nga faza e dytë e procesit të përzgjedhjes së kandidatëve të mundshëm të PD-së.